کوئٹہ: قائدِ اعظم کی 150ویں سالگرہ کے تناظر میں خطاطی و مصوری کی نمائش

کوئٹہ: ڈائریکٹوریٹ آف کلچر، حکومتِ بلوچستان کے زیرِ اہتمام بانیٔ پاکستان قائدِ اعظم محمد علی جناح کی آنے والی 150ویں سالگرہ کے تقریبی سلسلے کے تحت آج ایک پروقار خطاطی اور مصوری کی نمائش کا انعقاد کیا گیا۔

اس نمائش میں صوبہ بھر سے 100 سے زائد نامور اور ابھرتے ہوئے فنکاروں نے بھرپور شرکت کی اور اپنے فن کا مظاہرہ کیا۔ فنکاروں نے اپنے برش اور رنگوں کے ذریعے قائدِ اعظم محمد علی جناح کی حیات و خدمات، ان کے افکار اور تحریکِ پاکستان میں ان کے تاریخی کردار کو کینوس پر انتہائی خوبصورتی سے اجاگر کیا۔

نمائش میں پیش کیے گئے فن پاروں اور خطاطی کے شاہکاروں نے شرکاء اور شائقینِ آرٹ سے خوب داد سمیٹی۔ اس تقریب کا بنیادی مقصد آنے والی 150ویں سالگرہ کے تناظر میں نئی نسل کو قائدِ اعظم کے اصولوں سے روشناس کرانا اور بلوچستان کے باصلاحیت فنکاروں کو ایک شاندار پلیٹ فارم مہیا کرنا ہے۔