گورنر جعفر خان مندوخیل سے وفود کی ملاقات: کوئٹہ کے شہری مسائل اور اسٹریٹ کرائمز پر تبادلہ خیال

کوئٹہ: گورنر بلوچستان جعفر خان مندوخیل سے صوبائی وزیر میر عاصم کرد گیلو اور رکن صوبائی اسمبلی زرک خان مندوخیل کی قیادت میں مختلف وفود کے نمائندوں نے گورنر ہاؤس کوئٹہ میں ملاقات کی۔ ملاقات میں کوئٹہ شہر اور مضافاتی علاقوں میں عوام کو درپیش مسائل، بڑھتے ہوئے اسٹریٹ جرائم، بنیادی سہولیات کی فراہمی اور شہریوں کی مشکلات سمیت مختلف امور پر تفصیلی تبادلہ خیال کیا گیا۔

گورنر بلوچستان نے کہا کہ کوئٹہ تیزی سے پھیلتا ہوا شہر ہے، اس لیے آبادی میں اضافے کے ساتھ انتظامی، ٹریفک، صفائی، صحت، تعلیم، پانی، نکاسی آب اور اسٹریٹ کرائمز کے مسائل بھی بڑھ رہے ہیں۔ ان سے نمٹنے کے لیے تمام متعلقہ اداروں کے درمیان مربوط اور فعال رابطہ ضروری ہے۔ انہوں نے کہا کہ عوامی خدمت کا اصل معیار یہ ہے کہ عام شہری کو اپنے مسائل کے حل کے لیے غیر ضروری مشکلات کا سامنا نہ کرنا پڑے۔

انہوں نے کہا کہ حکومت، انتظامیہ، پولیس اور عوامی نمائندوں کو باہمی تعاون سے شہریوں کو بہتر ماحول اور بنیادی سہولیات کی فراہمی یقینی بنانا ہوگی۔ کوئٹہ اور مضافات کے مسائل کے حل کو ترجیحی بنیادوں پر یقینی بنانے کے لیے اقدامات کیے جا رہے ہیں، اور سڑکوں، صحت و صفائی، نکاسی آب، بجلی، پانی اور دیگر مسائل کے حل کے لیے متعلقہ اداروں کو اپنی ذمہ داریاں مزید مؤثر انداز میں ادا کرنا ہوں گی۔

اسٹریٹ کرائمز پر قابو کے لیے اقدامات

گورنر نے کہا کہ بڑھتے ہوئے اسٹریٹ کرائمز پر قابو پانے کے لیے ٹھوس اور مؤثر اقدامات کیے جا رہے ہیں۔ شہریوں کے جان و مال کا تحفظ حکومت اور متعلقہ اداروں کی بنیادی ذمہ داری ہے، اس لیے پولیس اور انتظامیہ کو جدید تقاضوں کے مطابق اپنی کارکردگی مزید بہتر بنانا ہوگی۔ جرائم کی روک تھام کے ساتھ شہریوں میں احساسِ تحفظ پیدا کرنا بھی ناگزیر ہے۔

انہوں نے کہا کہ منتخب عوامی نمائندے محض دفاتر تک محدود رہنے کے بجائے وقتاً فوقتاً اپنے حلقوں کا دورہ کر کے عوام سے براہِ راست رابطہ کریں اور ان کے مسائل سنیں، کیونکہ یہ رابطہ جمہوری نظام کو مضبوط بنانے کے ساتھ مسائل کے بروقت حل میں بھی معاون ثابت ہوتا ہے۔ گورنر نے منتخب نمائندوں پر زور دیا کہ وہ عوامی مسائل متعلقہ محکموں کے سامنے مؤثر انداز میں اٹھانے کے ساتھ ان کے پائیدار حل کے لیے فالو اپ وزٹ بھی کریں تاکہ مسائل صرف شکایات اور یقین دہانیوں تک محدود نہ رہیں بلکہ عملی طور پر حل ہوں۔

ملاقات میں وفود نے اپنے اپنے علاقوں کے مسائل سے گورنر کو آگاہ کیا۔ گورنر نے ان کے سوالات کے جواب دیتے ہوئے متعلقہ حکام کو ضروری اقدامات کی ہدایات جاری کیں اور مسائل کے حل کے لیے ہر ممکن تعاون کی یقین دہانی کرائی۔

تصویر: بشکریہ ڈی جی پی آر بلوچستان