نصیرآباد: 1995 میں پٹواری کی سند لینے والے گل محمد مستوئی کو بالآخر تعیناتی کا آرڈر مل گیا

نصیرآباد: نصیرآباد ڈویژن میں نوے کی دہائی میں پٹواری کی سند حاصل کرنے والے امیدوار کو موجودہ حکومت کی میرٹ پالیسی کے مطابق تعیناتی کا آرڈر جاری کر دیا گیا۔ کمشنر نصیرآباد ڈویژن صلاح الدین نورزئی نے 1995 میں سند حاصل کرنے والے گل محمد مستوئی کو پٹواری کے عہدے پر تعیناتی کا آرڈر دیا۔

گل محمد مستوئی طویل عرصے سے تعیناتی کے منتظر تھے اور اس دوران دیہاڑی پر مزدوری کر کے اپنے خاندان کا گزر بسر کرتے رہے۔ کمشنر نے وزیر اعلیٰ بلوچستان میر سرفراز بگٹی، چیف سیکرٹری شکیل قادر خان اور ایس ایم بی آر قمبر دشتی کی میرٹ پر مبنی پالیسی کے تحت انہیں جائے تعیناتی کے احکامات جاری کیے۔

کمشنر صلاح الدین نورزئی نے کہا کہ حکومت کے وژن اور واضح پالیسی کے مطابق ان حقدار اور اہل امیدواروں کو میرٹ پر تعیناتی کے آرڈرز جاری کیے جا رہے ہیں جو طویل عرصے سے ملازمت کے منتظر تھے۔ انہوں نے کہا کہ گل محمد مستوئی کو آرڈر دیتے ہوئے خوشی محسوس ہو رہی ہے، میرٹ اور حقدار افراد کے حقوق کے تحفظ کے اقدامات کو مزید وسعت دی جائے گی اور اہل امیدواروں کو ان کا جائز حق دینے کا سلسلہ جاری رہے گا۔

تصویر: بشکریہ ڈی جی پی آر بلوچستان