گوادر کے تین کلسٹر ہیڈ گرلز اسکولوں کے بجٹ 2025-26 کا آڈٹ مکمل، ریکارڈ تسلی بخش قرار

گوادر: وزیر اعلیٰ بلوچستان میر سرفراز بگٹی کی تعلیم کے فروغ، شفافیت اور سرکاری وسائل کے مؤثر استعمال کی پالیسی کے تحت ضلع گوادر میں کلسٹر ہیڈ اسکولز کے بجٹ سال 2025-26 کے استعمال کا تفصیلی آڈٹ مکمل کر لیا گیا۔

اسسٹنٹ کمشنر گوادر رومیل نعیم جان کی ہدایات پر ڈسٹرکٹ ایجوکیشن آفیسر (فیمیل) زراتون بلوچ نے گورنمنٹ گرلز ہائی اسکول بخشی کالونی، گورنمنٹ گرلز ہائر سیکنڈری اسکول گوادر اور گورنمنٹ گرلز ہائی اسکول ملا بند کا آڈٹ کیا، جس میں بجٹ کے استعمال، سامان کے رسیونگ سرٹیفکیٹس، بلز واؤچرز، اسٹاک رجسٹرز اور فیڈنگ اسکولز کے ریکارڈ کا جائزہ لیا گیا۔ تینوں اسکولوں میں بجٹ کا استعمال اور ریکارڈ تسلی بخش قرار پایا۔

گورنمنٹ گرلز ہائر سیکنڈری اسکول گوادر کا ریکارڈ خصوصی طور پر منظم، شفاف اور سسٹمیٹک پایا گیا۔ آڈٹ رپورٹ میں کلسٹر ہیڈ میڈم رشیدہ اور ان کے معاون علی شاہ کی محنت کو سراہتے ہوئے سفارش کی گئی کہ دیگر کلسٹر ہیڈز بھی اس انتظامی ماڈل سے استفادہ کریں۔

گورنمنٹ گرلز ہائی اسکول ملا بند کا مالی و انتظامی ریکارڈ درست پایا گیا، تاہم اسکول کی عمارت کی خستہ اور غیر محفوظ حالت کی نشاندہی کرتے ہوئے اس کی فوری مرمت و بحالی کی سفارش کی گئی تاکہ طالبات کو محفوظ تعلیمی ماحول میسر آ سکے۔ محکمہ تعلیم کے مطابق ایسے آڈٹس کا مقصد سرکاری فنڈز کا شفاف استعمال اور تعلیمی اداروں میں مالی نظم و نسق اور جوابدہی کو بہتر بنانا ہے۔

تصویر: بشکریہ ڈی جی پی آر بلوچستان