دکی میں کول مائنز کی سیکیورٹی کا جائزہ، اسسٹنٹ کمشنر محمد اکرم حریفال کی حفاظتی خامیاں دور کرنے کی ہدایت

دکی: ڈپٹی کمشنر دکی فضل الرحمن کبدانی کی ہدایت پر اسسٹنٹ کمشنر دکی محمد اکرم حریفال کی زیرِ صدارت ضلع دکی میں کول مائنز کمپنیوں کے مالکان، منیجرز اور مجاز نمائندگان کا اہم اجلاس منعقد ہوا، جس میں کوئلہ کانوں کے حفاظتی انتظامات، موجودہ سیکیورٹی صورتحال اور ضروری حفاظتی اقدامات کا تفصیلی جائزہ لیا گیا۔

اجلاس میں مائنز انسپکٹر قادر خان مری، نائب تحصیلدار اکرام اللہ خان ترین اور مختلف کول مائنز کمپنیوں کے مالکان، منیجرز و نمائندگان نے شرکت کی۔

اسسٹنٹ کمشنر محمد اکرم حریفال نے کہا کہ کوئلہ کانوں میں کام کرنے والے مزدوروں، عملے اور تنصیبات کا تحفظ مشترکہ ذمہ داری ہے، لہٰذا تمام کول مائنز انتظامیہ اپنی کانوں کے سیکیورٹی انتظامات کا ازسرِنو جائزہ لے کر موجودہ تقاضوں کے مطابق مؤثر اقدامات یقینی بنائیں۔

گارڈز، روشنی اور سی سی ٹی وی

اجلاس میں سیکیورٹی گارڈز و چوکیداروں کی تعیناتی، داخلی و خارجی راستوں کی نگرانی، رات کے اوقات میں سیکیورٹی و روشنی، کانوں کی حدود، مشینری اور حساس تنصیبات کے تحفظ اور CCTV کیمروں کی دستیابی و فعالیت سمیت دیگر امور کا جائزہ لیا گیا۔ کان مالکان اور منیجرز کو حفاظتی خامیاں فوری دور کرنے، غیر متعلقہ افراد کی آمدورفت پر کڑی نظر رکھنے اور مشکوک سرگرمی کی صورت میں فوری طور پر متعلقہ حکام کو اطلاع دینے کی ہدایت کی گئی۔

اجلاس میں ہنگامی صورتحال میں پولیس، ضلعی انتظامیہ اور متعلقہ اداروں سے فوری رابطے کے طریقہ کار پر بھی بات ہوئی اور ہنگامی رابطہ نمبرز اور ذمہ دار افراد کی معلومات ہر وقت اپ ڈیٹ رکھنے پر زور دیا گیا۔

اسسٹنٹ کمشنر نے واضح کیا کہ حفاظتی اقدامات محض رسمی کارروائی تک محدود نہیں ہونے چاہئیں بلکہ ان پر عملی اور مؤثر عملدرآمد یقینی بنایا جائے، جبکہ ضلعی انتظامیہ، محکمہ مائنز، پولیس اور کول مائنز انتظامیہ کے باہمی تعاون سے سیکیورٹی انتظامات کی مسلسل نگرانی اور بہتری کا عمل جاری رکھا جائے گا۔

تصویر: بشکریہ ڈی جی پی آر بلوچستان