انجینئرنگ یونیورسٹی خضدار میں ہائیڈرو تھون 2026 کا انعقاد، پانی کی بچت اور موسمیاتی تبدیلی پر زور

خضدار: بلوچستان یونیورسٹی آف انجینئرنگ اینڈ ٹیکنالوجی خضدار کے آڈیٹوریم میں ہائیڈرو تھون 2026 کا شاندار اور کامیاب انعقاد کیا گیا۔ تقریب کا اہتمام یونیورسٹی کی پیس اینڈ کریکٹر بلڈنگ سوسائٹی نے ریوائیول آف بلوچستان واٹر ریسورسز پروگرام (RBWRP) کے تحت اقوام متحدہ کے ادارہ برائے خوراک و زراعت (ایف اے او) اور یورپی یونین کے اشتراک سے کیا۔

تقریب کی مجموعی منصوبہ بندی، انتظامات اور انعقاد آر بی ڈبلیو آر پی کے پراجیکٹ کوآرڈینیٹر اسرار رئیسانی، پراجیکٹ منیجر انجینئر شکیل بلوچ اور کمیونیکیشن، آؤٹ ریچ اینڈ انگیجمنٹ اسپیشلسٹ سید عبداللہ شاہ نے انجام دیے۔

«اب وقت عملی طور پر کچھ کر دکھانے کا ہے»

تقریب کے مہمانِ خصوصی پرو وائس چانسلر انجینئرنگ یونیورسٹی خضدار ڈاکٹر سہراب خان بزنجو تھے۔ انہوں نے منتظمین کی کاوشوں کو سراہتے ہوئے کہا کہ نوجوانوں کو پائیدار آبی وسائل کے انتظام، موسمیاتی تبدیلیوں سے ہم آہنگی، ماحولیاتی تحفظ اور قدرتی وسائل کے ذمہ دارانہ استعمال سے آگاہ کرنا وقت کی اہم ضرورت ہے، اور انہوں نے اس نوعیت کی سرگرمیوں کو بلوچستان کے مستقبل کے لیے نہایت اہم قرار دیا۔

ڈاکٹر سہراب بزنجو نے شرکاء کو عملی اقدامات کی طرف متوجہ کرتے ہوئے کہا کہ اب وقت صرف مشورے دینے کا نہیں بلکہ عملی طور پر کچھ کر دکھانے کا ہے۔ «پانی ہماری سب سے بنیادی ضرورت ہے، اس لیے ہم سب کو مل کر پانی کی بچت کرنی ہوگی۔ یہ بچت ہم نے اپنے لیے اور اپنے آنے والے کل کے لیے کرنی ہے۔»

اس موقع پر طلباء کا کہنا تھا کہ یہ منصوبہ خصوصی طور پر ہنگول اور ہامون ماشکیل کے دریائی طاسوں کو ہدف بناتا ہے، جو خشک سالی اور زیرِ زمین پانی کی شدید کمی کا شکار ہیں۔ ہائیڈرو تھون 26 جیسے اقدامات سے مقامی نوجوانوں میں مسائل کی نشاندہی اور ان کے حل کا احساس پیدا ہوگا، جبکہ بارانی پانی جمع کرنے، اسمارٹ آبپاشی کے طریقوں، کم پانی والی فصلوں کی کاشت اور ڈیزل بورنگ پر انحصار کم کر کے متبادل توانائی کی طرف منتقلی میں مدد ملے گی۔

مباحثے، پوسٹر، فوٹوگرافی اور تھیٹر کے مقابلے

تقریب میں رجسٹرار ڈاکٹر سید جلال شاہ، ڈائریکٹر جنرل کوالٹی انہانسمنٹ سیل انجینئر لیاقت علی لہڑی، آر بی ڈبلیو آر پی ساؤتھ کے پراجیکٹ منیجر انجینئر شکیل احمد، ایچ آر منیجر اسرار رئیسانی، سبجیکٹ میٹر ایکسپرٹ ڈاکٹر صلاح الدین، سید عبداللہ شاہ، مانیٹرنگ آفیسر فرحان مگسی، آئی ٹی ایکسپرٹ انجینئر شیر مینگل، یونیورسٹی کے تمام شعبہ جات کے چیئرمین، ایف اے او خضدار کے نمائندے رضوان احمد اپنی ٹیم کے ہمراہ اور ایف اے او کوئٹہ کے نمائندے انجینئر احتشام الحق نے شرکت کی، جبکہ انجینئر طلال نصیر اور اسد آن لائن پروگرام کا حصہ بنے۔

ہائیڈرو تھون 2026 کے دوران طلبہ و طالبات کے لیے انگریزی اور اردو مباحثے، پوسٹر، فوٹوگرافی، مختصر دستاویزی فلم (شارٹ ڈاکیومنٹری) اور تھیٹر پرفارمنس کے مقابلے منعقد ہوئے، جن کا مرکزی موضوع پائیدار آبی وسائل کا انتظام، موسمیاتی لحاظ سے موافق زراعت، لائیو اسٹاک کی ترقی اور رینج لینڈ کا تحفظ تھا۔ طلبہ نے بھرپور جوش و خروش سے اپنی تخلیقی صلاحیتوں، جدت پسندی اور ماحولیاتی شعور کا مظاہرہ کیا۔

تقریب کے اختتام پر نمایاں کارکردگی دکھانے والے طلبہ و طالبات میں شیلڈز اور اسناد تقسیم کی گئیں۔ منتظمین نے ایف اے او، یورپی یونین، یونیورسٹی انتظامیہ، بی آر سی کے پروفیسر انعام اللہ مینگل سمیت فیکلٹی ممبران، ججز، طلبہ، صحافی برادری اور تمام شرکاء کا شکریہ ادا کیا۔ تقریب میں اس عزم کا اعادہ کیا گیا کہ یونیورسٹی، ایف اے او اور یورپی یونین پائیدار قدرتی وسائل کے مؤثر انتظام، آبی وسائل کے تحفظ، موسمیاتی تبدیلیوں سے نمٹنے اور نوجوانوں کو مستقبل کے ماحولیاتی چیلنجز کے لیے بااختیار بنانے کے مشترکہ مشن پر کاربند ہیں۔

تصویر: بشکریہ ڈی جی پی آر بلوچستان