کوئٹہ میں آٹے کی قیمتوں پر کنٹرول: ڈپٹی کمشنر مہراللہ بادینی کا سرکاری نرخوں کی خلاف ورزی پر سخت کارروائی کا حکم

کوئٹہ: ڈپٹی کمشنر کوئٹہ مہراللہ بادینی کی زیرِ صدارت ضلعی انتظامیہ کے افسران کا اجلاس منعقد ہوا، جس میں شہر میں آٹے کی قیمتوں کو کنٹرول کرنے، پرائس کنٹرول کارروائیوں اور جاری ترقیاتی اسکیمات کی پیش رفت کا تفصیلی جائزہ لیا گیا۔

اجلاس میں ڈپٹی کمشنر کو آٹے کی قیمتوں اور مارکیٹ میں اس کی دستیابی پر بریفنگ دی گئی۔ انہوں نے ہدایت کی کہ عوامی مفاد کو مدنظر رکھتے ہوئے آٹے کی قیمتوں پر مؤثر کنٹرول یقینی بنایا جائے اور حکومت کے مقرر کردہ نرخوں کی خلاف ورزی کرنے والوں کے خلاف بلاامتیاز سخت کارروائی کی جائے۔

ڈپٹی کمشنر نے کہا کہ عوام کو مقررہ نرخوں پر اشیائے ضروریہ کی فراہمی ضلعی انتظامیہ کی اولین ترجیح ہے، اس لیے پرائس کنٹرول کارروائیوں کا دائرہ وسیع کیا جائے اور روزانہ کی بنیاد پر ان میں اضافہ کیا جائے۔

انہوں نے ترقیاتی اسکیمات کی مسلسل نگرانی کی ہدایت کرتے ہوئے کہا کہ معیار، رفتار اور بروقت تکمیل کے لیے افسران باقاعدگی سے فیلڈ میں جا کر منصوبوں کا معائنہ کریں، اور تمام انتظامی افسران عوامی مسائل کے فوری حل، پرائس کنٹرول اور منصوبوں کی نگرانی کی ذمہ داریاں تندہی سے انجام دیں۔

تصویر: بشکریہ ڈی جی پی آر بلوچستان